Brian Buhagiar – Page 34 – Is-sit uffiċċjali tal-Kolleġġjata Perinsinji ta' Marija Immakulata

May 10, 2020 Brian Buhagiar Comment

Kitba ta’ Mario Attard

L-Għan Tal-Kitba

Hija ħaġa naturali daqs kemm hija komuni li ċittadin Bormliż jgħid li huwa minn Bormla. L-istess kif jagħmlu ċittadini minn bliet u rħula oħra. Iżda meta nfittxu dwar kemm nafu xi jfisser l-isem tal-belt tagħna, is-sikta tirrenja fuq il-parti l-kbira tal-kotra. Bil-għan li ngħin biex innaqqas minn din is-sikta u ngħarraf liċ-ċittadini tagħna jgħollu aktar is-sens ċiviku tagħhom, ħsibt li nikteb din il-kitba. Minbarra tagħrif fuq isem beltna, ħadt ħsieb li nagħmel referenza lejn inħawi antiki li l-qabda l-kbira tagħhom intesew, iżda mhux minn fuq il-folji tar-reġistri tan-nutara – dawn għadek isibhom imniżżla fl-arkivji notarili. Irrid inżid ukoll li għadd ċkejken ġmielu minn dawn l-inħawi għadhom attwali. Jinsabu għaddejjin minn moħħi l-inħawi ta’ San Ġwann t’Għuxa, Santa Margerita u Santa Liena.

Sorsi

Dan il-għan li fassalt f’moħħi bnejtu primarjament fuq il-ktieb voluminuż ta’ Godfrey Wettinger, Place-names of the MalteseIslands ca. 1300-1800. Referenza oħra siewja ħadtha mid-djarju The Siege of Malta 1565 tal-Kavallier Francesco Balbi di Correggio stampat għall-ewwel darba fl-1567 f’Alcala de Henares u fl-1568 f’Barcellona. Fl-1867 kien inqaleb għall-Ingliż mill-Maġġur Henry Alexander Balbi. Il-verżjoni li nirreferi għaliha kienet stampata f’Copenhagen fl-1961. L-Assedju l-Kbir – Ġrajjiet ta’ Kull Jum ta’ Mons. E.Coleiro. Referenza oħra ħadtha mill-ktieb maħruġ mill-Kustodju ta’ l-Altar tal-Kor Bormla bl-isem Żvilupp tal-Qima lejn Marija Verġni Immakulata f’Bormla, stampat fl-1949.

Burmola – Interpretazzjonijiet

Bormla hija “distrett, u llum belt, fil-ġewwieni tal-qala bejn Sant’Anġlu u l-Isla”. In-Nutar C. Canchur fl-att tas-16 ta’ Settembru 1501 jirreferi għaliha bħala contrada ta burmula – id-distrett ta’ burmula (Wettinger, p.65). L-istess nutar jirreferi għal Bormla bħala ta bur mile, contrada fil-5 ta’ Ġunju 1523. In-Nutar Gerolamo Cumbo jikteb fid-19 ta’ Mejju 1537 ta murmule, suburbii maris, contrada – b(m)urmule, subborg mal-baħar u distrett (Wettinger, p.65). Interessanti r-referenza għal Bormla miktuba fil-21 ta’ Ġunju 1577 u misjuba fil-Mużew tal-Kattidral ta’ l-Imdina, burmula citta della Vittoriosa, citta de Malta (Wettinger, p.65).

Godfrey Wettinger f’paġna 72 jagħtina l-isem Bullumeni, insibu li dan kien qasam, jew aħjar fewdu, qrib il-Birgu. Il-possibilita’ hija li dan l-isem imniżżel fis-26 ta’ Marzu 1373, qiegħed jirrferi għal Bormla.

Fuq kollox Wettinger ma jonqosx milli jagħti t-tifsira tal-kelma Bur Mula f’p.65, jiġifieri l-mergħa tal-Mulej jew inkella il-mergħa ta’ Mula. L-istess awtur ma jonqosx milli jfakkarna li Mula sar kunjom u huwa wieħed attwali wkoll. Il-kelma Bur fid-dizzjunarju ta’ Ġuże’ Aquilina English-Maltese Dictionary Vol. III, p(.1824) jiddeskriviha bħala biċċa art baxxa mistagħdra ħafna drabi qrib xi xmara (baħar). Jirreferi għaliha wkoll mill-Għarbi, jiġifieri litteralment art mhux ikkultivata, moxa. Fil-waqt li mula jfissirha mill-Għarbi wkoll bħala Sid jew lord. Aquilina jsemmi l-possibilita’ wkoll li burmula ġejja minn bu ramla għall-bajja li ntilfet fid-dagħbien bil-bini tal-baċir numru wieħed. (Maltese-English Dictionary Vol.1,137).

Erin Serracino Inglott f’Il-Miklem Vol. 1 (p.212) jiddeskrivi lill-bur bħala art moxa (ftit jew wisq ħawlija) li tiswa bħal mergħa li dari r-rgħajja kienu jieħdu l-bhejjem tagħhom jirgħu. Serracino Inglott f’p.188 tad-dizzjunarju msemmi jfisser lill-kelma Bormla bħala il-bur li fih il-milja (i.e. m’huwa nieqes minn xejn, l-aktar, nemmen, f’sens agrikolu, meta nafu li l-biedja u s-sajd kienu l-mezzi ewlenin tal-għajxien. Bormla f’dak iż-żmien kellha mit-tnejn).

Interpretazzjoni mibnija fuq xeħta popolari hija li l-isem ta’ Bormla ġej minn bir-il Mulej. Dan l-isem, imsemmi ħafif ħafif ‘il fuq, huwa mibni grammatikalment bl-istat kostrutt jirreferi għall-fehma li fl-Iżmna mbiegħda sewwa, fejn il-lum tinsab il-belt Bormliża kien hemm ġiebja kbira (jew bir) li kienet taqdi lill-pubbliku ta’ l-inħawi tal-madwar.

Il-preżenza ta’ l-ilma f’pajjiż irrenjat ġmielu min-nixfa (l-aktar f’dawk Iż-żminijiet), ipprovdiet grazzja kbira daqskemm popolarita’. B’danakollu, in l-interpretazzjoni ta’ minn fejn seta’ ġej l-isem Burmola ma tantx qabdet art. (Lulju Settembru 2004)

Il-kelma barbar tipprovdi possibilita’ oħra ta’ oriġini għall-ewwel nofs ta’ l-isem Bormla. Dan l-isem li grammatikalment ħa sura kwadrilitteri, ġejja mill-kelma ripetuta barra barra. Minnha ħa l-ewwel sillaba li ġiet ripetuta. Barr (minn barra) ħadet is-sura ta’ Bur. Min isostni din il-fehma jemmen fiha għaliex Bormla, qabel aktar mil-lum, kienet tinsab barra s-swar tal-Birgu u l-Isla. Din il-fehma emmen fiha bis-sħiħ l-istoriku Annibale Preca.

Bil-ħsieb li nkompli nipperżenta kull interpretazzjoni possibli minn fejn ġej l-isem tal-Belt Cospicua, isnemmi studjuż ieħor qadim ta’ l-istorja Maltija – b’Achille Ferris li emmen li Burmola tfisser post dominanti, fuq l-oħrajn (fiz-zona tiegħu), u għalhekk iħares ‘l isfel lejn il-madwar tiegħu. Biż-żejjed hawn insemmiu lill-għoljiet ewlenin ta’ Santa Margerita, ta’ San Ġwann t’Għuxa u ta’ Kordin (li fl-imgħoddi kienet waħda mill-ħames għoljiet li ffurmaw lil Bormla oriġinali).

Permezz ta’ Wettinger, iżjed ‘il fuq issemma l-kunjom Mula. Naraw l-interpretazzjoni ta’ dan il-kumjom kif jagħtiha b’rabta ma’ Bur Mula Mario Cassar f’The Surnames of the MalteseIslands, f’paġni 260-261. Raħal fil-limiti ta’ Ħaż-Żebbuġ kien Ħal Mula li tfisser id-dar tar-razzett tal-familja Mula bil-bini madwarha. L-isem Ma;lti kompost minn żewġ partijiet Bormla huwa t-ttaqsira ta’ Bur Mula li tfisser il-mergħa ta’ Mula.

B’kurżita’ nsemmi wkoll li jeżisti raġal fil-provinċja ta’ Potenza bl-isem La Mula. Barra minn hekk, insibu l-kunjom (anki jekk forsi taħt laqam) eżistenti fl-1145 fost l-ilsiera Musulmani f’Malta maħkuma min-Normanni.

Ismijiet Ta’ Nħawi F’Bormla U Madwarha

Il-lista ta’ ismijiet ta’ nibdiha bil-ħames għoljiet li oriġinarjament taw is-sura bikrija lil Bormla. Għad li dawn diġa’ ssemmew fil-kitba tiegħi Bormla – Ħarsa lejn l-għeruq, it-Tnissil u l-Iżvilupp Tagħha (li dehru fl-ewwel tliet ħarġiet tal-gazzetta tal-Kunsill ta’ Bormla, Sehemna), ikun xieraq li jkunu jiffurmaw parti mil-lista sħiħa ta’ partijiet qodma li rnexxieli niġbor.

Il-ħames għoljiet huma l-Għolja tal-Ġonna, li għad li m’hix l-ogħla għolja f’Bormla, fil-quċċata tagħha tinsab il-Kolleġġjata ta’ Marija Immakulata. L-Għoljiet ta’ Pażan u ta’ Santa Margerita li jeħduk lejn Ħaż-Żabbar. L-Għolja ta’ Ġerman tqarrbek lejn iż-Żejtun fil-waqt li Kordin jieħdok lejn ir-Raħal il-Ġdid.

Godfrey Wettinger fi Place-Names of the MalteseIslands ca.1300 – 1800, isemmi bħala l-ewwel naħa eżattament ħdejn Bormla lill-fewdu ta’ Dosa. Minbarra dan l-isem huwa magħruf ukoll bħala ta’ Pietra Longa.

Irridu ngħidu li f’Ħal Millieri (fejn iż-Żurrieq) kien hemm għalqa li ġġib l-istess isem. Ġan Franġisk Abela f’Della Descrittione di Malta Isola nel Mare Siciliano (1647) jkteb hekk: Ta Dosa jew Pietra Lunga, fuq it-territorju ta’ Bormla li kienet f’idejn il-Gran Mastru. Dosa ġejja minn Johannes de Osa li fl-aħħar parti tas-Seklu 14 (circa 1374) ingħata l-fewdu msemmi ta’ Pietra Longa. Fl-20 ta’ Awissu 1408 kien għaddieh lil Puchio de Termis.

Il-Qsajjem ta’ Petra Longa hija referenza oħra għal ta’ Dosa jew San Ġwann t’Għuxa – Nut. Giuliano Muscat, 15 ta’ Settembru 1544. Pietra Longa hija kelma oħra għal menhir li kienet tinsab f’dik iz-zona. Kif nafu, menhir hija ħaġra twila u antika jew imwaqqfa minn żmen il-ħaġar inkella l-ħaġra ttieħdet minn xi lok pre-istoriku u tqiegħdet fil-post bħala monument. (Ottubru-Diċembru 2004)

Bejn ta’ Dosa (jew San Ġwann t’Għuxa) u tal-Barrani f’Ħal Tarxien kien hemm ġiebja msemmija ta’ Bir Għulem. Id-data teħodna fis-27 ta’ April 1568. tajjeb in kunu nafu li għuliem tista’ tfisser żagħżugħ jew ilsir inkella qaddej (p.43).

Ta’ Għuxa (ta huxe) huwa distrett fil-punent ta’ Bormla. In-Nutar Canchur isemmih fl-20 ta’ Frar 1521. Naturalment, il-ħsieb jaqa’ fuq San Ġwann t’Għuxa, hekk imsemmi minn Wettinger f’paġna 495. Dan ta’ l-aħħar jiddeskrvih bħala naħa qrib Għajn Dwieli Mons. E. Coleiro f’L-Assedjdu l-Kbir – Ġrajjiet ta’ Kull Jum jikteb f’paġna 52 li sa żmien l-Assedju tal-1565 fuq San Ġwann t’Għuxa kien hemm ftit abitazzjonijiet u għalhekk kien jitqies bħala l-villaġġ. In-Nutar Canchur iniżżlu bħala distrett, bid-data tkun 15 ta’ Frar 1505. L-istess jikteb in-Nutar Giuseppe de Guevara fid-19 ta’ Settembru 1541. Ġ.F.

Abela jikteb fil-volum tiegħu msemmi ‘l fuq dwar il-knisja tal-qaddis u l-istatwa kbira ta’ l-injam miġjuba fuq waħda mill-karrakki ta’ Rodi. Wettinger joħloq rabta bejn il-knisja ta’ San Ġwann t’Għuxa u l-familja ta’ Johannes de Osa , fejn iqisha bħala l-kappella tal-familja de Osa. Din il-familja għexet f’Malta matul it-tieni nofs tas-Seklu 14. Storikament nafu li l-ewwel kappella ta’ San Ġwann t’Għuxa kienet iktar ‘l hinn minn fejn tinsab il-lum – kienet mibnija fl-1373 u kienet iġġib l-arma tal Isqof Anonio Vulpano li fid-data msemmija kien Isqfof ta’ Malta.

Għall-ewwel kienet tagħmel mal-parroċċa ta’ Bir Miftuħ imma mbagħad mill-1592, meta Ħal Tarxien sar paroċċa, saret tagħmel miegħu. Din twaqqgħet biex inbnew is-swar u flokha nbniet oħra ġewwa s-swar fejn tinsab il-lum. Inbniet fl-1682 bi flus il-Pirjol Fra Pietro Viany. Ma’ din il-knisja kien hemm Palazz (magħruf mal-Bormliżi bħala l-palazzina) li parti minnu kienet is-sagristija u miegħu kellu ġnien.

Dan ġarrab ħsara ġmielha fl-aħħar gwerra u fl-1971 minflok irrestawrawh twitta għal kollox Distrett ieħor f’Bormla kien ta’ l-Għassieli misjub fl-att notarili tan-Nut. Canchur fil-5 ta’ Ottubru 1523. Aayn Duyeli jew aħjar Għajn Dwieli tissemma minn Wettinger f’paġna 182 – qala li Ġ.f. Abela jsemmi lill-baħar tagħha b’wieħed salmastru (kif kienet il-qala fil-Mandraġġ ta’ Bormla qabel ittieħed mill-Ingliżi biex inbena l-Baċir Nru.1). Għad li Dwieli tfisser siġar tal-għeneb, Wettinger ma jeskludix il-fatt li seta’ kien il-Wied ta’ Wali (isem Għarbi). Id-data li jagħti l-volum ta’ Wettinger hija tat-2 ta’ Frar 1649.
Ġnien Gwaltieri hija għalqa f’Bormla li fil-Malti tal-lum ninterpretawh bħala r-raba’ ta’ Walter. Lil din l-għalqa nsibuha mniżżla fl-att notarili tat-30 ta’ Ottubru 1518. in-Nutar kien C. Canchur. L-istess nutar fid-dokument tat-13 ta’ Settembru 1501, isemmi lill-għelieqi tal-Gżir jew talgisir. L-istess Nut. Canchur fil-5 ta’ Ġunju 1523 jikteb fuq l-istess għelieqi “talgisir. galcula in contrada bir mile” (p.176).
Żewġt għelieqi oħra msemmija f’Bormla huma tal-Maqta, hekk imniżżla min-Nutar Gerolamo Cumbo fil-15 ta’ Ottubru 1536.
Ħabel raba’ f’Bormla kien ta’ Twila, hekk imniżżel fid-dokument tan-Nutar de Guevara fis-7 ta’ Marzu 1542.

Ta’ Żinżilin kienet għalqa oħra f’Bormla (p.633) – tazinzili, clausura in contrada taburmula bid-data 12 ta’ Jannar 1535 (fil-Mużew Kattidrali ta’ l-Imdina).
Għalqa magħrufa bħala ta’ Triq Xolantar tissemma f’paġna 556. Hija mniżżla fl-att notarili tan-Nutar G.D. Pace fil-5 ta’ Awissu 1695 bħala għalqa li kienet tinsab ġewwa l-fortifikazzjonijiet tal-Kottonera. Xolantar jew Xiruntar kien kunjom lokali fl-1483. Bħala prova nsemmu lil Enrico Xirintano fit-30 ta’ Novembru 1428.

Merħlet il-Mogħoż (p.374) huwa l-post fejn il-Birgu fejn fih is-suldati tal-għassa kienu joqgħod fiż-żmien li fih fl-1523 il-Birgu kien maqtugħ mill-bqija tal-madwar minħabba l-pesta. Dan jissemma fid-data 1 ta’ Ġunju 1523. Dan il-lok jerġa’ jissemma min-nutar Mario Briffa fil-31 ta’ Lulju 1621.

L-Imżiebel huwa post qrib il-Birgu; eżattament kien jinsab bejn il-Knisja ta’ Santa Margerita u tal-Għassieli. Fost id-dati li fihom jissemma dan il-post insibu l-eqdem waħda tat-13 ta’ Settembru 1372. (Wettinger p.408).

Barra l-Birgu, tissemma l-lokalita’ ta’ Qarraba bid-data 7 ta’ Ottubru 1523 (p.435).
Barra l-Birgu wkoll, eżattament bejn ħdejn tat-Torba u l-Imżiebel tissemma f’paġna 327 in-naħa ta’ Ħosen. In-Nutar Canchur isemmi dan il-post fit-13 ta’ Lulju 1524.

‘Il fuq sewwa semmiet l-Għolja ta’ Santa Margerita. Wettinger isemmiha f’paġna 512. Hija mfissra min-Nutar Canchur fil-11 ta’ Lulju 1503 bħala barra l-Birgu. Għolja oħra li ssemmiet ‘il fuq hija ta’ Kordin. F’paġna 603 Godfrey Wettinger isemmi x-Xagħra ta’ Għajn Rabib. Din kienet zona ddominata minn għajn imsemmija għal missier jew iben tar-rispett. Id-data miġjuba hija tal-15 ta’ April 1536 fil-waqt li n-nutar kien G. Buttigieg. Qrib Kordin jissemma wkoll Għar Ħanżira. Dan jissemma minn Ġ.F. Abela fl-1647.

Naħa partikulari li tinsab fuq fomm in-nies daqs kemm tinsab Fuq Santa Margerita hija Santa Liena. Nafu li l-bieb ta’ Santa Liena kellu mportanza enormi għas-swar interni tal-Kottonera. Il-fatt li ssemma għal Santa Liena jixhed il-fatt li dik iz-zona kienet magħrufa b’dak l-isem. B’danakollu, il-Kavallieri Balbi jsemmi lil din il-parti ta’ Bormla l-ewwel bħala Santarena imbagħad Santa Liena. Hawn min isostni li Santarena kien kavallier. Hi x’inhi, faċilment jista’ jkun li Santa Liena hija taħsira ta’ Santarena. Daqs ħamsin sena ilu, fuq ġewwa tal-bieb ta’ Santa Liena, kien hemm artal u mwaħħal fuqu pittura ta’ Santa Liena wieqfa bis-Salib ta’ Kristu.

Fid-djarju The Siege of Malta 1565 il-Kavallier Francesco Balbi di Correggio jagħtina s-sehem ta’ l-Għolja ta’ Santa Margerita, Fuq San Ġwann t’Għuxa kif ukoll l-Għolja ta’ Kordin. Ma ninsewx li dawn il-qagħdiet strateġiċi għal dawk iż-żminijiet, kienu f’idejn it-Torok u ntużaw kontra l-qagħdiet ta’ l-Ordni ta’ San Ġwann fil-Birgu u fl-Isla.

Ħaġa ta’ min josserva f’għadd mill-inħawi msemmija hija marbuta man-nuqqas ta’ eżattezza fejn jinsabu l-inħawi mogħtija. Huwa minnu li għadd ieħor minn dawn l-inħawi jinftiehmu fejn kienu jinsabu. Biss dan in-nuqqas ma setax jingħeleb għall-fatt li n-nutara li niżżluhom fl-atti notarili tagħhom baqgħu ħafna drabi vagi wisq. Madanakollu, dan it-tagħrif flimkien ma’ ftit ta’ l-immaġinazzjoni, jgħin biex min jaqra jikkrea fi ħsiebu ċerti l-imgħoddi ta’ ċerti nħawi ta’ Bormla.

Tagħrif dwar il-parroċċa

Bormla u l-Metodisti

May 10, 2020 Brian Buhagiar Comment

Kitba ta’ Mario Attard

Fuq il-Għolja ta’ Santa Margerita hija marbuta b’mod magħruf ma’ l-Assedju l-Kbir ta’ l-1565 fejn it-Torok kienu stazzjonati u attakkaw kemm lill-Forti Sant’Anġlu fil-Birgu kif ukoll lill-Forti San Mikiel fl-Isla. B’danakollu, forsi ftit jafu li din il-parti prominenti f’Bormla, kemm storikament kif ukoll ġeografikament, hija mniżżla fl-istorja lokali bħala l-għajn ewlenija li bis-saħħa tagħha l-Metodisti kellhom kuntatt dirett u għal ħafna snin ma’ Bormla. Dan għaliex fix-Xgħajra kien hemm kemm knisja tal-Metodisti kif ukoll ir-Rest (il-lum is-sit ta’ l-amministrazzjoni tal-Kunsill Lokali Bormla) li fih saru servizzi kemm reliġjużi kif ukoll soċjali tal-Metodisti.

Is-sors ewlieni f’din il-kitba storika jibqa’ primarjament il-ktieb The Floriana Story li l-Knisja Metodista f’Malta kienet ħarġet fl-1963. Għalkemm dan il-ktieb ma jippreżentax lill-awtur, id-daħla hija miktuba minn Eric H. Fawthrop. Ktieb ieħor li tani palata kien Malta & Gozo, Then & Now ta’ Joseph Bonnici u Michael Cassar, stampat fl-1989. Għajnuna oħra, din id-darba viżiva, li tawni l-awturi Bonnici u Cassar kienet bis-saħħa tal-ktieb The Malta Grand Harbour and its Dockyard, stampat fl-1994.

Il-Bidu Tal-Preżenza Metodista F’Bormla

Il-mistoqsija li tinbena minnha nnifisha b’mod naturali hija dwar x’wassal biex il-Metodisti jiġu Malta. Immorru lura fl-1815 u mill-ewwel nifhmu li pajjiżna kien jinsab fl-ewwel snin tal-ħakma Ingliża1. Il-preżenza tas-suldati u l-baħrin Ingliżi kienet ir-raġuni ewlenija għaliex il-metodisti rifsu fuq artna. Dan kollu beda minn talba magħmula minn sudati Ingliżi fis-sena msemmija. Sa dak inhar dawn is-suldati kien diġa’ kellhom post mikri fejn fih kienu jipprattikaw il-Metodiżmu tliet darbiet fil-ġimgħa bil-qari, bit-talb u bis-servizzi mmexxija lkoll minn uffiċjal ta’ wieħed mir-reġimenti. Din it-talba wasslet biex fl-1823 wasal f’Malta Rev.Charles Cook D.D. biex jagħmel rapport dwar il-possibilita’ li l-Kumitat Missjunarju Metodista f’Londra jibgħat pastor f’pajjiżna.

Fiż-żjara tiegħu, Rev. Cook sab tliet postijiet li fihom kien ipprattikat regolarment is-servizz Metodist. Dawn kienu jinsabu fl-Isla, fil-Furjana u fil-Belt. Għalhekk fi tmien snin mindu saret it-talba msemmija fil-ftuħ, infetħu żewġ lokalitajiet oħra għall-prattika Metodista f’Malta.

L-ewwel pastor għal pajjiżna kien Rev. John Keeling, li flimkien ma’ martu, ma damx ma sab dar f’Bormla maġenb il-Konservatorju (il-lum id-dar ta’ l-anzjani ta’ Bormla). Peress li f’Bormla ma kienx hawn post għall-prattika Metodista, Rev. Keeling kien jipprattika l-iktar fl-Isla f’kamra li kienet tesa’ erbgħin ruħ. Fiha kienu jsiru żewġ servizzi kull nhar ta’ Ħadd, laqgħa l-Ħadd wara nofs inhar u oħra kull nhar ta’ Ħamis fil-għaxija. Ma setax jonqos li l-preżenza ta’ Rev.Keeling kienet meħtieġa kemm fil-Furjana kif ukoll fil-Belt. Rev.Keeling wasal f’Malta f’Awissu 1824.

Id-dar tal-pastor Metodista f’Bormla, li baqgħet tintiret minn pastor għal ieħor, żgur li kienet vitali biex f’Bormla mhux biss ikun hawn lokal bħal dawk imsemmija, imma wkoll knisja Metodista. Għad li kienet prattika li l-Metodisti jsarrfu dar fi knisja, il-liġi Maltija ta’ dak iż-żmien ma kinetx tippermetti dan, għalhekk kellhom jibnu knisja.

Diversi Maltin kienu jiffurmaw parti mill-ġemgħa Metodista f’Malta. Kienu jaqraw biċċiet mill-evanġelju ta’ San Ġwann lil għadd ta’ fqar u wara kienu jagħtuhom xi ħaġa bħala elemosina. Meta mbagħad din l-attivita’ twettqet mir-Rev.Keeling, il-biċċa nħasset provokattiva. Fil-fatt saru attakki fuq id-dar tal-pastor f’Bormla, fejn kotra mhux ħażin ta’ nies attakkawha bil-ġebel, bdew isabbtu mal-bibien u jħabbtu mat-twieqi. Tant kienet gravi s-sitwazzjoni li Rev.Keeling u martu kellhom jaħarbu minn fuq il-bjut li kienu jmissu ma’ daharhom. Dan ir-rapport jikkonferma li tant twaddbu ġebel, li wara kellhom jinġarru bil-karretta.

Rapport ieħor fost oħrajn ġara nhar is-26 ta’ Marzu 1825 meta għat-8.30 a.m. xi tfal intbagħtu apposta jħabbtu l-bieb tad-dar ta’ Rev.Keeling biex jittallbu. Mrs.Keeling intebħet li dawk it-tfal ma kellhomx qatgħa ta’ tallaba u qalet lis-seftur biex jibgħathom lura. Ġara iżda li dan is-seftur spiċċa attakkat bil-ġebel minn żewġt irġiel u mbagħad bdew jitfgħu l-ġebel lejn il-bibien u t-twieqi. Baqgħu sejrin hekk sakemm inzerta għaddej surġent. Dan ġab il-kalma mill-ġdid sakemm għas-sagħtejn ta’ wara nofsinhar ġemgħa ta’ madwar mitejn jew tliet mitt ruħ inġabret ħdejn l-istess dar u bdiet titfa’ mill-ġdid il-ġebel. Din il-folla mgħaddba tferrxet wara li waslu tliet għassiesa armati. Minħabba dan kollu, il-Gvernatur Hastings ħareġ ordni li titqiegħed għassa stretta mad-dar tal-pastor.

Tkompli l-Ostilita’ Lejn Il-Metodisti

Sentejn wara l-wasla ta’ Keeling, fl-1826, intbagħat pastor ieħor, Dr. W.H.Rule. Peress li Rev.Keeling kien telaq joqgħod il-Belt, Dr.Rule beda joqgħod flok sieħbu fid-dar ta’ Bormla. Għad li l-ostilita’ tal-Bormliżi lejn il-Metodisti ma mitetx, biss l-id ferma tal-gvern kolonjali Ingliż berrdet sewwa l-qiegħa. B’danakollu Dr.Rule stqarr kemm-il darba li meta l-Bormliżi kienu jgħaddu minn maġenb daru, kienu jlissnu b’leħen li jinstema’ ħafna kliem li jinstiga s-saħta fuqu. Huwa ħa ħsieb li li jżomm kelb għall-għassa u kellu trumbun 2. Hekk bl-inbiħ tal-kelb u bid-dehra ta’ l-ixkubetta l-kotra setgħet iżżomm lura. Minkejja dan, fi kliem Dr.Rule stess, il-kliem ta’ saħta magħdud min-nies għaddejja u l-ħsejjes ma jaqtgħux ta’ dixxiplina ġejjin minn konservatorju għat-tfajliet3 li kien jinsab bieb ma’ bieb miegħu, kienu jservu ta’ sfond kuljum waqt l-istudji tiegħu. Fil-fatt Dr.Rule stqarr kemm-il darba li kulmeta jkun sejjer iżur il-morda fl-isptar ta’ Bighi kien isib min joqgħod jitfagħlu l-ġebel.

Din l-attitudni l-aktar tal-Bormliżi lejn Dr.Rule bdiet madwar sitt xhur mill-wasla tiegħu f’Malta. Kollox beda meta kien għaddej il-vjatku mit-triq fejn qassis bis-sagrament kien sejjer jassisti moribond. Dr.Rule inzerta fost il-folla preżenti li min-naħa tagħha niżlet għarkubbtejha tagħti qima lil Ġesu’ Sagramentat. Dr.Rule biss baqa’ bil-wieqfa. Dan il-ġest urta lill-kotra li qieset lil dan il-pastor bħala bniedem ostili għat-twemmin Nisrani tagħhom u ma kellux imqar rispett lejn il-kultura Nisranija. Minn dak inhar kulmeta jarawh kienu jitfgħulu l-ġebel u jgħajruh Mażun. Fil-fatt il-Maltin kienu jqisu lil dawn in-nies bħala mażuni għalkemm il-Metodisti kienu jqisu lilhom infushom bħala soċjeta’.

Tliet xhur wara dan il-każ, Dr.Rule kien miexi ma’ martu minn fejn daru u spiċċaw attakkati bil-ġebel fejn ġarrbu xi ġrieħi ħfief. Hawn ħass li hemm bżonn li jibda jitlob il-ħarsien tal-pulizija. Fil-fatt il-pastor irranġa ma’ uffiċjal navali biex jimxi warajh f’distanza hekk li ma jagħtix fil-għajn. Nhar it-12 ta’ Jannar 1827 wara nofs in-nar, waqt li kien għaddej Dr.Rule ra ġejja għal fuqu xita ta’ ġebel. L-uffiċjal qabad lil raġel b’saħħtu u tifel. Picket ħadhom l-għassa. Meta l-għada ttellgħu l-Qorti, kotra kbira ta’ Maltin xehdu fil-falz meta qalu li dak in-nhar ir-raġel akkużat kien jinsab Għawdex il-lejl kollu. It-tifel kien instab ħati u l-Qorti ssentenzjatu ħmistax-il ġurnata ħabs. Dr.Rule iżda talab lill-Qorti biex taħfirlu.

Dan il-każ għokor il-għajn tal-Ġustizzja hekk li nħareġ avviż uffiċjali lill-abitanti tat-triq fejn kien attakkat Dr.Rule, li jekk xi ħaġa oħra bħal dik terġa’ sseħħ, id-djar jitbattlu u jingħalqu bil-liġi. Dan kien biżżejjed biex tispiċċa dik l-ostilita’ lejn il-pastor f’Bormla.

Dr.Rule ġarrab iżjed ostilita’ mill-Maltin minn dawk il-ftit eżempji li semmejna. Każ partikulari ġara fil-5 ta’ Awissu 1826 meta telaq minn Bormla lejn il-knisja Metodista tal-Belt. Huwa stagħġeb hekk kif wasal qrib il-knisja Metodista. Sab folla kbira ta’ nies miżmuma mis-suldati li kienet lesta li tiftaħ in-nar kemm-il darba din tażżarda titniffes. Barra minn hekk huwa kien mogħti l-parir mill-ajjutant tar-Reġiment sabiex iżomm id-dwal mitfija inkella jkun attakkat. L-ajjutant talbu biex jagħmel dan peress li għal dik il-folla kollha huwa ma kellux biżżejjed forza. Wara, sabiex imur lura lejn Bormla bil-baħar, kellhom jaqbżu nofs il-lejl sakemm l-ordni kienet ikkontrollata. Ftit wara sar jaf bir-raġuni u li l-kotra kienet imgħaddba mhux għalih kienet imma għal Rev.Keeling. Wieħed mill-ewwel Maltin li qalbu mal-Metodisti kien miet u Rev.Keeling u Rev.S.S.Wilson (li kien jnsab għal btala) irranġawlu għall-funeral. Issellef il-karru tal-mejtin tas-servizz u għall-ħamsa tal-fil-għaxija beda l-funeral li kellu jintemm fiċ-ċimiterju tal-Furjana. Ġara iżda li folla dejjem tikber għal eluf inġabret u bdiet tgħajjat, tinsulta, issaffar u twerżaq. Bdew jitwaddbu l-ġebel u taw is-salt għat-tebut…sal-faldrappa tal-mejtin ħadu u ċarrtu minn fuq it-tebut. Minħabba f’hekk, minn Misraħ San Ġorġ (jew il-Main Guard il-qadim) ‘il quddiem il-funeral kompla sa l-aħħar taħt il-ħarsien tal-militar. Fost inċidenti oħra li ġraw waqt dan il-funeral insemmu kif il-ħġieġa tal-karrozzella fejn kien jinsab Rev.Wilson tfarrket u lil suldat qasmulu rasu b’ġebla. Wara l-funeral, Keeling u Wilson kellhom ikunu eskortati lura f’darhom fil-waqt li r-ronda mat-toroq tal-belt baqgħet għaddejja mal-lejl kollu.

Dr.Rule imbagħad beda jemmen li l-kaġun wara dik l-ostilita’ kollha tal-Maltin lejhom kien il-mod ħażin li bih kien jieħu d-deċiżjonijiet Rev.Keeling. Il-fatt li ddikjara fil-beraħ lil Rev.Keeling bħala eċċentriku wassal għal tfixkil fit-tmexxija Metodista f’Malta peress li Rev.Keeling kien il-kap tal-missjoni Metodista f’pajjiżna. Minħabba f’hekk Dr.Rule intabagħat Ġibilta’ fil-31 ta’ Mejjiu 1827.

Ir-reazzjoni tal-Maltin lejn Maltin oħra li qalbu għall-Metodiżmu ma kinetx waħda tajba lanqas. Jissemmew nies tan-negozju u tal-professjoni li wara li qalbu tilfu sa ħobżhom. Ngħidu aħna negozjanti ftaqru wara li ħadd ma beda jixtri mingħandhom. Tabib, ċertu Dr. Naudi li wkoll sar Metodista, tilef bosta mill-klijenti li kienu jindew bih. Lejn l-1842 l-istampatur Izzo u l-ħaddiema tiegħu kienu interdettjati mill-Knisja Kattolika għaliex kienu qegħdin jistampaw il-gazzetta tal-Metodisti “The Illuminator”. Dan ġara fi żmien Rev. John Jenkins.

L-ostilita’ lejn il-membri tal-Metodiżmu f’Malta baqgħet għaddejja bla nifs. Dan il-fatt malajr wassal biex kemm jistgħu l-Metodisti jibdew jattendu bil-moħbi għas-servizzi tagħhom. Il-membri Maltin kienu jiltaqgħu għalihom milli ma’ l-Ingliżi u kienu jippredkawlhom bit-Taljan Rev..Keeling u Dr.Rule.

Fil-bidu tal-1831 Rev.Keeling beda l-Malta Charity School għat-tfal il-fqar tal-Maltin. Din l-iskola bdiet tiżdied fl-attendenza sakemm fit-tielet jum attendew sebgħin student. Il-parti l-kbira tagħhom kienu orfni, u dawk li ġejjin minn Bormla kienu jinġiebu minn uffiċjal bl-uniformi.

Laverack U L-Bidu Tar-Rest

Is-snin għaddew u nbidlu diversi pastors. Wara l-irtirar ta’ Rev.Keeling, ġie minfloku Rev. John Brownell li dam f’Malta ħames snin. Warajh ġie Rev. Thomas N. Hull li dam bejn l-1838-41. Fl-1842 ġie Rev.John Jenkins u dam sentejn, sal-1844. Fl-1869 kien responsabbli mill-Metodiżmu f’Malta Rev.W.S.Caldecott. Dan ta’ l-aħħar, fl-1872 ħass il-bżonn ta’ knisja oħra biex is-servizzi reliġjużi jkunu jistgħu jsiru iktar frekwenti, u barra minn hekk il-postijiet disponibli bdew ikunu żgħar għall-attendenza. Biex ipatti għal dan in-nuqqas, is-servizz tal-Ħadd kien isir ukoll fit-Tarzna (dak iż-żmien H.M.Dockyard). Il-kamra wżata fit-Tarzna kienet żgħira wisq minbarra l-għadd ta’ rwejjaħ differenti mill-kamra tal-kafe’ li kienet tmiss magħha. Barra minhekk, l-isfond tat-Tarzna bix-xogħol ta’ materjal tqil tagħha ma kienx jirrendi lil dak il-lok b’xieraq għall-qima. Dan il-fatt ma kienx jiġbed aktar nies. Il-laqgħa ta’ talb tal-Ħadd fil-għaxija kienet issir fid-dar tas-suldati u l-baħrin daqs tmien minuti bogħod mit-Tarzna.

Il-konsiderazzjonijiet imsemmija wasslu biex tinbena l-Knisja tal-Metodisti fil-Furjana (1883) u li għadha preżenti. Bil-bini ta’ din il-knisja Metodista u bir-Rev. John Laverack jinħatar Senior Wesleyan Chaplain f’Malta, dan ta’ l-aħħar tefa’ ħarstu b’ħeġġa lejn il-Kottonera fejn il-Metodiżmu jaf għeruqu. Fl-1882 infetħet dar bħala d-Dar tas-Suldati u l-Baħrin fi Strada Cospicua. Din id-dar mill-ewwel saret post ta’ attrazzjoni evanġelika (stil Metodistia) u bdew jattendu ġemgħat ġmielhom. Sentejn wara fl-1844 fuq l-Għolta ta’ Santa Margerita nstab post eċċellenti fejn fih kien trasferit is-Soldiers’ and Sailors’ Rest (il-lum huwa l-lok tal-Kunsill Lokali ta’ Bormla). Din il-proprjeta’ kellha sala ideali li kompliet timbotta ‘l quddiem il-ħidma Metodista f’Bormla u l-madwar, hekk li bdiet taqdi x-xogħol temporanju ta’ knisja sakemm snin wara nbiet knisja Metodista fl-istess naħa ta’ Bormla.

Is-Soldiers’ And Sailors’ Rest Ta’ Bormla

Fl-1884 is-sit magħruf bħala “The Rest” infetaħ uffiċjalment biex jaqdi s-servizzi Metodisti, ukoll jekk kien xi ftit iċken mis-Soldiers’ and Sailors’ Home tal-Furjana. Bosta kienu l-attivitajiet imwettqa fir-Rest u l-attendenza bdiet tkun dejjem iktar inkoraġġanti. F’qasir żmien imbniet atmosfera ta’ ħbiberija u fraternita’ li sa anki kienet tisboq lil dik magħrufa fil-Furjana. Barra minn hekk, The Rest kellu l-bitħa li kienet tassew ideali għaż-żmien tas-Sajf sabiex fiha jsiru s-servizzi u attivitajiet oħra.
B’danakollu mhux kollox kien ward u żahar fejn jidħol l-akkwist tal-proprjeta’ tar-Rest li swiet elfejn lira sterlina. Sentejn wara l-ftuħ fl-1886 inħass tassew tqil il-piż tad-dejn marbut mar-Rest. Bil-għan li jinġabru l-fondi, ittalla’ Grand Bazaar li The Floriana Story tfissru bħala l-akbar bazaar li qatt ittella’ fil-gżejjer Maltin4. Il-post fejn ittalla’ kien fil-Ġyminasium, il-Belt Valletta nhar it-Tlieta u l-Erbgħa, 8 u 9 ta’ Frar 1887. Sabiex iktar ikun prominenti, dak il-bazaar kien taħt il-patronċinju tad-Duka u d-Dukessa ta’ Edinburgh (li ftit qabel kienu waslu f’Malta). Il-Gyminasium kien imżejjen bi ħwienet u bnadar żgħar ikkuluriti li kienu mqiegħda mill-baħrin ta’ H.M.S. Alexandria. Fost in-nies distinti li attendew għal dan il-bazaar kien hemm il-Gvernatur Sir Lintorn Simmonds u martu, il-Kaptan Chesney ADC u fuq kollox id-Duka u d-Dukessa ta’ Edinburgh u l-Prinċipessa Louise.

Il-bazaar infetaħ uffiċjalment mid-Duka ta’ Edinburh li iżjed tard ta donazzjoni b’risq il-bazaar ta’ ħamsa u għoxrin lira sterlina. L-istess soma ngħatat mis-Soldiers and Sailors’ Home tal-Furjana. Qabel il-ftuħ kienu mwiegħda erba’ mitt lira sterlina oħra. Ma naqsetx is-sehem tal-banda: nhar it-Tlieta, 8 ta’ Frar daqqet il-banda tas-South Yorkshire Regiment u l-għadal-Erbgħa l-banda Alexandra. B’kollox mill-bazaar inġabret is-somma ta’ tmien mitt lira sterlina (li tliet mija minnhom ġew direttament mill-bejgħ waqt il-bazaar).

Tqajmet kritika mhux ħażin peress li kif intqal kien hemm iktar postijiet f’idejn il-Metodisti li ħtieġu assistenza finanzjarja. Mr.Laverack ħass li bi tweġiba jippubblika tagħrif li fih jindika li l-bazaar kien qiegħed isir ġbir b’mira ta’ elfejn lira sterlina biex tinxtara l-proprjeta’ ta’ The Rest. B’hekk biss fisser Mr.Laverack setgħet tkun assikurata t-tkomplija tas-servizz utli li l-Metodisti kienu qegħdin jagħtu fl-inħawi tal-Kottonera. Barra minn hekk intefqu ħafna flus biex tinxtara l-għamara neċessarja. F’Diċembru 1886 żdied numru ta’ sodod u, stqarr Mr.Laverack, meta The Rest ikun mgħammar kif ippjanat, ikun jista’ jfendi għal rasu mill-flus li jdaħħal. B’żieda ma’ dan, dan is-sit li kien jagħmel mas-Soldiers’ and Sailors’ House tal-Furjana d’dawn l-aħħar tliet snin (jiġifieri bejn l-1884-87) qatt ma talab għal xi forma ta’ għajnuna finanzjarja. Din l-istqarrija kienet għaqlija biżżejjed biex tmewwet kull kritika.

Fl-1902 The Rest kien mifdi finanzjarjament u hekk ħidmietu kienet assikurata.
Bejn wieħed u ieħor mill-1890 ‘il quddiem, il-Metodiżmu f’Malta kien imsaħħaħ ġmielu bil-propjeta’. Kienu żdiedu fil-fatt postijiet f’Pembroke u fl-Imtarfa. Kien ikun hemm servizzi fil-Furjana u f’Bormla kuljum fl-10.30 a.m. fil-waqt li fil-għaxija kienu jsiru fis-6.30 p.m. f’Pembroke u fl-Imtarfa. Fil-Furjana u f’Bormla kien ikun hemm l-iskola tal-Ħadd u din kienet tkun fit-2.45 p.m.

F’dan il-perjodu (jiġifieri fi ftuħ is-seklu għoxrin) inħasset il-ħtieġa li f’Bormla jkun hawn knisja Metodista. Sakemm waslet biex tfaqqa’ l-ewwel gwerra dinjija, il-ħidma Metodsita kienet ibbażata fil-Furjana u f’Bormla, b’kull belt minnhom ikollha l-pastor tagħha.Is-servizz tal-Ħadd f’Bormla u l-Furjana kien isir daribtejn: fl-10.30 a.m. u fis-6.30 p.m., mentri l-iskola tal-Ħadd kienet issir fl-istess ħin bħal ta’ nofs il-ġimgħa.Minbarra servizzi reliġjużi, f’dawn iż-żewġt id-djar kienu jsiru attivitajiet soċjali bħal kunċerti. Il-ħlas tad-dħul kien ikun ta’ tliet soldi (jew ċenteżmu tal-lum) u sitt soldi (jew żewġ ċenteżmi tal-lum).

Peress li fil-gwerra l-kbira tal-1914 Malta serviet ta’ sptar għall-midrubin tal-gwerra, kull naqra wisa’ kienet tissarraf fi sptar. Il-Connaught Home (li ħadet post is-Soldiers’ and Sailors’ Home) u r-Rest kienu jkunu mballati bin-nies u bil-midrubin. Hawn irrid ingħid li sal-1926, meta twaqqfet il-Knisja Metodista f’Bormla, ir-Rest kien jaqdi l-irwol ta’ knisja Metodista wkoll.

Ir-Rest sal-1926 kellu sala kbira li fiha kien isir is-servizz tal-knisja, bitħa fin-nofs li kienet tagħti għad-dar tal-kappillan fuq ix-xellug tagħha, u numru ta’ kmamar żgħar. Is-sala l-kbira kienet tintuża wkoll għall-Badminton, għall-kunċerti kif ukoll għall-iskola tal-Ħadd. Waħda mill-kmamar iż-żgħar kienet tintuża bħala kċina mmexxija minn ċertu ‘Dear Old Dom” fejn kien jaqli l-bajd u ċ-ċips u jagħmel għadd bla qies ta’ te. Huwa kien ikun megħjun min-nisa tal-membri li kienu jagħmlu t-torti tal-laħam u l-pasti bil-ġamm u bit-tuffieħ. Fil-Ħdud fil-bitħa tar-Rest kien ikun hemm it-te bis-sitt soldi (2ċ.5 tagħna) kull tazza, mentri kull nhar ta’ Sibt wara nofs inhar kien ikun hemm ħarġiet fuq old wooden ‘buses5 għal xi piknik jew għal ħdejn il-baħar. Peress li l-Brittaniċi għadhom sal-lum imġenna għal tazza te, “Dear Old Tom” qatt ma kien ifalli u kien ikun imfittex minn dawk kollha preżenti ta’ kull darba. Meta kienu jirritornaw lura, kienu jattendu għal-laqgħa tat-talb. Wara kienu jiddevertu bil-logħob tal-badminton fil-waqt li qabel jirritornaw lura lejn djarhom, kulħadd kien jagħti daqqa ta’ id sabiex is-sala titqiegħed fl-odni ħalli l-għada l-Ħadd fil-għodu taqdi x-xogħol tagħha bħala knisja bis-servizz reliġjuż. Kull nhar ta’ Tlieta fir-Rest ta’ Bormla kienet tiltaqa’ klassi u l-Ħamis kienet tiltaqa’ s-Soċjeta’ Letterarja u Soċjali (Social & Literary Society). Għal din ta’ l-aħħar kienu jattendu mal-120 ruħ li kienu jassistu għal programmi varjati kull darba b’kelliemi distint u differenti. Fost dawn il-persunaġġiI nsemmu lil Lord Strickland (persunaġġ magħruf fil-qasam tal-politika bikrija Maltija kif ukoll kittieb prominenti) kif ukoll lil Sir Harry Luke (li tana kotba storiċi fuq pajjiżna). Imbagħad kull nhar ta’ Ġimgħa fil-għaxija kien imiss it-taħriġ tal-kor kif ukoll kienu jiltaqgħu l-Girl Guides. Nistgħu ngħidu li ta’ kull fil-għaxija dejjem kien ikun hemm xi ħaġa interessanti fir- Rest ta’ Bormla fejn it-te ma kien jonqos qatt. La semmejna t-te tajjeb insemmu drawwa marbuta miegħu. Ta’ kuljum uffiċjal tas-Servizz kien jinħatar bħala ‘I’ll Go” chair. Dmiru kien li jara li l-kitla bit-te tkun dejjem mimlija biex it-te ma jkunx skars meta ssir it-talba għalih. Logħba popolari li tista’ tgħid kienet tintlagħab kuljum kienet dik li tixbah lil-ludo – din tissejjaħ uckers. Kienu jsiru Lejliet Soċjali Kompetittivi fejn gruppi jikkontestaw lil xulxin mużikalment. Kull nhar ta’ Ħadd qatt ma kienet tonqos milli tittalla’ l-pantomina. Wara s-servizz reliġjuż tal-Ħadd fil-għaxija kien ikun il-ħin tas-Siegħa Soċjali fejn fiha kien isir kant ta’ għana popolari. Popolarment dan il-kant kien magħruf ma’ dawk preżenti bħala Sing Song. Ħaġa oħra li kienet tagħmel lir-Rest ta’ Bormla popolari kien il-fatt li ftit bogħod minnu kien hemm tennis court kenni bis-siġar.

Knisja Metodista F’Bormla

Ħaġa li serqet l-attenzjoni tal-mexxejja lokali Metodisti madwar ir-Rest kien ġemgħa ta’ bini n-naħa tat-triq l-oħra tar-Rest li sa ftit żmien qabel kien iservi ta’ skola (il-lum din in-naħa hemm ftit bandli għat-tfal u bħalissa qiegħda ssir it-tomlba). Fl-1926 dawn il-binjiet tbattlu u għalhekk beda x-xogħol min-naħa tal-Knisja Metodista ħalli takkwistahom. Sena wara (fl-1927) il-bini kollu spiċċa f’idejn il-Metodisti6. Għall-ewwel saret xi forma ta’ oppożizzjoni min-nies. Il-Metodisti sarrfu lil dawk il-binjiet fi Knisja u skola. Joseph Bonnici u Michael Cassar jgħidu f’Malta & Gozo The & Now li l-Garrison Church fuq il-Għolja ta’ Santa Margerita f’Bormla hija kopja eżatta ta’ dik li għadha teżisti u li tinsab fejn il-Barrakka ta’ Fuq fil-Belt7. Hekk, iż-żewġ ċentri Metodisti ta’ Malta, f’Bormla u fil-Furjana, issa kellhom il-knisja tagħhom kif ukoll dar. Id-dar tal-Furjana (Connaught Home) kienet afdata f’idejn il-kappillani tas-servizz Militari u r-Rest ta’ Bormla kien afdat f’idejn il-kappillani tas-Servizzi Navali. Chaplain Irving Davies kien kappillan navali partikulari li fl-għaxar snin li dam iservi fil-knejjes Metodisti tal-Furjana u ta’ Bormla, baqa’ mfakkar b’għożża fir-Rest ta’ Bormla. Fil-fatt dan u aktar huma minquxa fil-lapida li tinsab fil-Knisja tal-Metodisti fil-Furjana.

Il-knisja tal-Metodisti, fejn il-Barrakka ta’ Fuq, il-Belt Valletta –
Kopja eżatta tal-knisja tal-Metodisti f’Bormla

Intant, għall-knisja Metodista fuq l-Għolja ta’ Santa Margerita f’Bormla nxtraw mitejn siġġu mill-Ingilterra u waslu f’erba’ kaxxi, kull wieħed żarmat biex ikun ammontat fil-post: id-dahar, fuqhiex toqgħod bil-qiegħda, is-saqajn u fejn isserraħ il-ktieb. Kull biċċa kienet enumerata minn 1 sa 50. Bħala voluntieri biex jammontawhom offrew ruħhom ix-shipwrights u l-joiners. Meta waslu xi ħadd ħallat l-ordni tan-numri b’tali mod li minflok għen ħarbat tħarbita nobis! Ftit kienu dawk li qabblu l-partijiet tas-siġġu, u l-joiners damu l-ġimgħat jissegaw is-saqajn tas-siġġijiet biex ikunu jistgħu jieqfu dritti u mhux joqogħdu jixxenglu.

L-attendenza fil-knisja Metodista ta’ Bormla kienet waħda tajba u wara s-servizzi reliġjużi kienu jmorru r-Rest (fuq in-naħa l-oħra tat-triq) fejn kienet issir il-bibita kif ukoll is-Siegħa Soċjali. Fl-1928 inħatar kappillan navali sabiex jassisti għas-servizzi reliġjużi fuq il-baħar. Dan kien jattendi wkoll Bormla u l-Furjana.
Sa qabel faqqgħet it-tieni gwerra dinjija, din kienet il-ħidma Metodista f’Malta.

Kien il-bidu tat-tieni gwerra dinjija u sal-1940 insibu li fil-knisja Metodista ta’ Bormla kienu jsiru servizzi reliġjużi kuljum fl-10.30 a.m. u fis-6.30 p.m. fil-waqt li nhar ta’ Ħadd kienet issir l-iskola tal-Ħadd fit-2.45 p.m.

Is-snin li kienu resqin mill-1939 ‘il quddiem kellhom jibnu atmosfera li kellha taqleb il-folja tal-metodiżmu f’Bormla. In-nisa u l-familji tas-suldati u l-baħrin intbagħtu lura lejn darhom fil-pajjiż tagħhom. Għad li kienet deċiżjoni għaqlija, b’danakollu s-serenita’ li pajjiżna kien jinsab fih kellha tieħu daqqa ta’ ħarta kbira li ma treġġax il-biċċa lura lejn kif kienet qabel. Irridu nqisu li l-Għolja ta’ Santa Margerita kienet tinsab fil-qalba tal-mira tal-għedewwa Ġermaniżi u Taljani. Tant huwa hekk li kemm il-knisja Metodista u l-iskola kif ukoll ukoll ir-Rest ġarrbu ħsarat kbar mill-attakki mill-ajru waqt l-ewwel snin tat-tieni gwerra dinjija. Eżattament il-knisja Metodista u l-iskola ta’ magħha kienu ċeduti f’idejn l-awtoritajiet sabiex iservu ta’ mħażen għall-ħtiġijiet ta’ dawk il-mumenti diffiċli. Fil-fatt f’dan il-bini kien maħżun bosta ikel u meta nqered bil-bombi, bosta kienu n-nies ta’ l-inħawi li fittxew għall-ikel qalb ir-radam. Fl-1942 il-knisja tal-Metodisti nqerdet. Dan il-fatt waqqaf kull ativita’ tal-Metodisti f’Bormla. Għalhekk, il-ħidma Metodista ċċentrat fil-Furjana biss, fejn il-knisja tal-Metodisti skappat għalkemm mhux għal kollox mill-attakki tal-għadu. Irridu niftakru wkoll fl-1942 inqerdet il-knisja tal-Metodisti li kienet tinsab fi Triq Brittanja fil-Belt Valletta.

Issa kellha tittieħed deċiżjoni jekk il-knisja Metodista ta’ Bormla kellhiex tinbena jew le. Kien hemm it-tamiet li r-Rest ikun irranġat mill-ħsarat li ġarrab, iżda dawn sabu ma’ wiċċhom żewġ diffikultajiet ewlenin: l-istrajk tal-ħaddiema tal-barrieri u d-dewmien min-naħa tal-Gvern Malti dwar jekk għandux jibni jew le mill-ġdid lir-Rest. B’rabta mal-knisja tal-Metodisti f’Bormla, fl-1944 wasal f’Malta Rev.S.H.Keen, Principal Chaplain tal-R.A.F.. Huwa kellu jieħu d-deċiżjoni dwar jekk għandhiex tinbena jew le. Id-deċiżjoni kienet li l-knisja Metodista ta’ Bormla ma tinbeniex u l-ħidma tal-Metodisti f’Malta tkun iċċentrata fil-Furjana biss. The Floriana Story8 jikteb li din id-deċiżjoni ġabet ħafna qsim il-qalb u nostalġija. B’danakollu ż-żmien xehed li kienet deċiżjoni flokha.
Hekk ġiet fi tmiemha l-preżenza tal-Metodżmu f’Bormla. Fil-waqt li l-ewwel gwerra dinjija (1914 -1918) saħħet b’mod tremend lill-Metodiżmu f’Bormla, it-tieni gwerra dinjija temmet għal kollox dik il-ħidma. B’danakollu, kulma seħħ f’dan il-qasam jibqa’ mniżżel fl-istorja kemm ta’ pajjiżna kif ukoll ta’ Bormla nnifisha.

Referenzi:

1	Fl-1800 l-Ingliżi kienu daħlu f’Malta fuq talba tal-Maltin stess biex jgħinuhom jeħilsu mill-preżenza tal-Franċiżi. L-Ingliżi mhux biss keċċew lill-Franċiżi imma baqgħu jindokraw lil Malta biex kif xtaqu l-Maltin stess, Malta taqa’ taħt l- Ingliżi u mhux mill-ġdid taħt il-Kavallieri ta’ San Ġwann kif kien jordna l-ftehim tat-Trattat ta’ Amiens f’Marzu 1802. Ħafna minn dan il-ftehim ma kienx onorat u dan wassal għall-gwerer Napoleoniċi li damu bejn l-1803-14. Wara t-telfa ta’ Napuljun, sar l-ewwel Trattat ta’ Pariġi f’Mejju 1814 fejn Malta saret uffiċjalment kolonja ta’ l-Imperu Brittaniku.
2	Trumbun huwa tip ta’ xkubetta tal-qedem bit-toqba wiesgħa li kienet tispara f’distanza qasira.
3	L-Istitut għax-xebbiet, dak magħruf bħala l-Konservatorju ta’ San Ġużepp inbena fl-1910 fi żmien l-Isqof Labini. Matul Iż-żmien kompla jitkabbar mill-Isqfijiet Mattei u Sant. Qablu kien hemm ieħor li mbagħad inbidillu l-użu tiegħu.
4	The Floriana Story, paġna 28.
5	Ibidem, paġna 36.
6	Ibidem, paġna 37.
7	Malta & Gozo Then & Now, Joseph Bonnici u Michael Cassar, BDL, 1989, paġna123.
8	The Floriana Story, paġna 41.

Stampi

Il-plakka ta’ tifkira lil Rev. Irving Davies u agħti t-traduzzjoni tagħha
(The Floriana Story, paġna 31)

Is-sit tal-knisja Metodista u l-iskola mwaqqgħin u r-Rest
(The Floriana Story, paġna 26)

HMS Hibernia u fl-isfond jidhru tajjeb il-Garrison Church u r-Rest fuq l-Għolja ta’ Santa Margerita
(Malta & Gozo, Then & Now, paġna 38)

Il-Garrison Church fejn il-Barrakka ta’ Fuq fil-Belt Valletta
(Malta & Gozo, Then & Now, paġna 123)

Dehra ġenerali ta’ Xatt Iż-Żejt (Oil Wharf) f’Dockyard Creek, Bormla. F’dan ir-ritratt tidher tajjeb ħafna l-Knisja tal-Metodisti fuq l-Għolja ta’ Santa Margerita.
(The Malta Grand Harbour and its Dockyard, Joseph Bonnici & Michael Cassar, p.40)

Il-Knisja tal-metodisti ta’ Bormla
maħruġa minn ritratt tal-bastiment Hibernia
stampat f’Malta & Gozo Then & Now

Author: Brian Buhagiar

Ismijiet ta’ nħawi qodma f’Bormla U l-madwar